Sögu Íslandshótela má rekja aftur til ársins 1992 þegar Hótel Reykjavík var opnað við Rauðarárstíg 37. Hótelið opnaði með 30 herbergi og þrjátíu árum síðar voru hótelin orðin 19 og um 2.400 herbergi.
Fyrirhugað hafði verið að húsnæðið að Rauðarárstíg 37 ætti að vera skrifstofubygging en Ólafur Torfason og fjölskylda ákvað að veðja frekar á hótelrekstur. Þessi framtíðarsýn þótti merkileg á sínum tíma þar sem ekki margir stefndu á ferðaþjónustuna.
Árið 1994 var Holiday Inn keypt og ári síðar var nafninu breytt og nýtt Grand Hótel Reykjavík opnað með 109 herbergi.
Árið 1997 opnaði Gullteigur, stærsti ráðstefnusalur landins, á Grand Hótel Reykjavík en hann rúmaði 500 manns. Við þessa viðbót þá efldist verulega funda- og ráðstefnugeta hótelsins.
Hótel Reykjavík Centrum við Aðalstræti opnar þetta ár. Hótelið er byggt á gömlum grunni en elsti hluti hússins var byggður árið 1764 og fá töfrar liðinna tíma að skína í gegn. Hótelið er með 89 herbergi.
Grand Hótel Reykjavík stækkaði um 202 herbergi er tveir sambyggðir 13 hæða turnar risu. Var hótelið þar með orðið stærsta hótel landsins með 311 herbergi.
Í lok árs 2008 varð breyting á eignarhaldi Fosshótela þegar Ólafur Torfason keypti meirihluta í félaginu en Fosshótel keðjan var stofnuð árið 1996. Árið 1999 keypti Íslandshótel 10% hlut í Fosshótelum.
Árið 2012 markaði sérstök tímamót í sögu Íslandshótela, en þá voru öll hótelin sameinuð undir merkjum Íslandshótela. Á næstu árum fjölgaði hótelunum jafnt og þétt á landsbyggðinni. Meðal annars Fosshótel Austfirðir á Fáskrúðsfirði sem opnaði árið 2013 eftir endurgerð í samvinnu við Minjavernd.
Árið 2015 opnaði Fosshótel Reykjavík dyrnar og var því orðið stærsta hótelið á Íslandi með 320 herbergi. Sunnan heiða var Fosshótel Hekla einnig opnað. Sama ár var byrjað að sækja um og innleiða gæðavottun Vakans sem tók mið af þáttum eins og t.d. umhverfi, öryggismálum, menntun og þjálfun starfsfólks.
Mikil stækkun átti sér stað þetta ár. Hótel voru opnuð víðsvegar um landið og eitt glæsilegasta hótel landsins Fosshótel Jökulsárlón opnaði við rætur Öræfajökuls. Tvö Fosshótel opnuðu á Vesturlandi þ.e. á Hellnum og í Stykkishólmi. Jafnframt var Fosshótel Húsavík stækkað og herbergjafjöldi fór úr 66 í 110 herbergi.
Í einstaklega fallegu umhverfi opnaði Fosshótel Mývatn dyr sínar árið 2017. Sama ár voru herbergin á Fosshótel Reykholt endurnýjuð ásamt móttöku og bar. Fosshótel Núpar var stækkað ásamt því að ný móttaka og barsvæði var tekið í notkun. Á Grand Hótel Reykjavík var nýr og endurgerður Háteigur opnaður.
Horft inn á við og unnið með gildi, þjónustuloforð, áherslur og framtíðarsýn sem birtast í nýju myndmerki Íslandshótela og endurspeglar það sem hótelkeðjan og starfsfólkið stendur fyrir.
Undirbúningur hófst að stækkun á Fosshótel Reykholti og Fosshótel Stykkishólmi.
Þrautseigja og kraftur starfsfólks Íslandshótela skein í gegn við þessar fordæmalausu aðstæður. Nánast á hverjum degi stóð starfsfólkið frammi fyrir nýjum áskorunum og hnikaði hvergi á þessum erfiðu tímum.
Í maí voru öll 17 hótelin opin á ný sem var mikið gleðiefni. Í júlí opnaði svo Hótel Reykjavík Saga, nýtt og glæsilegt hótel sem er einstaklega vel staðsett í hjarta miðbæjarins.
Íslandshótel er stolt af því að vera fyrsta íslenska hótelkeðjan til að öðlast fulla Green Key vottun fyrir öll 17 hótel sín. Þessi virta, alþjóðlega viðurkennda vottun hefur stuðlað að sjálfbærum starfsháttum í yfir 60 löndum í meira en 25 ár.
Þann 1. september tók Íslandshótel við rekstri Hilton Reykjavík og Hótel Reykjavík Askja, áður Hilton Reykjavík Nordica og Reykjavík Natura. Með viðbótinni fjölgaði hótelum félagsins í 19 og herbergjum í um 2.400. Um leið hófst nýr kafli í sögu þessara rótgrónu Reykjavíkurhótela.
